MAHAKAMA YA WILAYA YA LUDEWA YATOA HUDUMA ZA KIMAHAKAMA KWA NJIA YA MTANDAO

tarehe Iliyowekwa: February 1st, 2023

Mkuu wa Wilaya ya Ludewa Mhe. Victoria Mwanziva leo Februari 01, 2023 amekuwa mgeni wa heshima katika Maadhimisho ya kilele cha siku ya Sheria Nchini, kiwilaya yamefanyika katika ukumbi wa Halmashauri ya Wilaya ya Ludewa.

Aidha Mhe. Victoria ameipongeza mahakama ya Wilaya ya Ludewa kwa kutoa elimu ya Sheria kwa wananchi na kushiriki shughuli mbalimbali za kijamii kuelekea kilele cha wiki ya sheria nchini ikiwemo, utoaji wa elimu ya Kisheria pamoja na Michezo mbalimbali.

Kwaupande wake Hakimu Mfawidhi wa Mahakama ya Wilaya ya Ludewa Mhe. Isaac Ayeng’o wakati akitoa Taarifa ya mafanikio ya matumizi ya TEHAMA katika shughuli za kimahakama amesema kuwa “Mahakama kupitia mtandao yake inawawezesha wateja wa mahakama wenye KOMPUTA, VISHIKWAMBI PAMOJA NA SIMU JANJA kuweza kupata taarifa mbalimbai za mahakama”.

Ameongeza kuwa, kwasasa mahakama inatoa huduma kwa njia ya TEHAMA ili kuongeza uwazi,kupunguza gharama wakati wa ufunguaji mashauri, kupata taarifa za mashauri, kufanya malipo ya ada za mashauri lakini pia mahakama imefanikiwa kusikiliza hukumu mbili kwa njia ya video mtandao (Video Conference).